Aiaraldea “oldartzeko prest” dagoela aldarrikatu zuten larunbatean Iruñean eginiko Euskaltzaleon Martxan. Autobusa antolatu zen eskualdetik Euskalgintza Kontseiluak deitutako mobilizaziora joateko, eta bertan joan ziren bizilagunek pankarta propioa eraman zuten, “Aiaraldea oldartzeko prest. Euskaltzaleak, esnatu ala hil” lemarekin.
Milaka euskaltzalek parte hartu zuten larunbateko mobilizazioan,”euskaraz bizitzeko behar den dena” aldarrikatzeko. Hiru zutabetan banatuta abiatu zen martxa, eta Gaztelu plazan egin zuten amaiera ekitaldia. Bertan, erronka kolektibo bat jarri zuten mahai gainean: euskarak 300.000 hiztun irabaztea 10 urtean, "egungo euskalduntze erritmoa bikoiztuz".
“Euskarak etorkizuna izango badu, datozen hamarkadetan hizkuntza bizi eta noranahiko izaten segituko badu, jauzi bat ezinbestekoa da hizkuntza-politiketan. Paradigma aldaketa bat. Minorientzako hizkuntza-politikak atzean utzi, eta ezagutza orokortzea eta normal erabiltzeko egiazko baldintzak ekarriko dituzten hizkuntza-politika anbiziotsu eta ausartak behar dira”, aldarrikatu zuen Idurre Eskizabelek, Kontseiluko idazkari nagusiak.