Gaur 16:00etan bildu dira Tubacex enpresako ordezkariak eta Laudio eta Amurrioko lantegietako sindikatuak konpainiak abiatu nahi duen Aldi Baterako Enplegu Erregulazioko Espedientea dela eta. Ekaineko 23an, 26an, 29an eta uztailaren 1ean elkartuko dira berriro.
Multinazionalak dokumentazioa eman die langileen ordezkariei eta iragarri du beharginen lanaldia murrizteko neurria uztailaren 6an abiatu nahi duela otsailaren 28an amaitzeko. Hau da, martxoan itzuliko litzateke normaltasuna Aiaraldeko fabriketara.
Momentuz, ELAk eta LABek zabaldu dituzte oharrak batzarrari buruz. ELArena informatiboa izan da nagusiki, eta aipatu du espedientearen eragina %70koa izango dela, hau da, 95 egunekoa langile bakoitzeko.
Halaber, erakundeak azaldu du zuzendaritzak argudiatu duela Ukrainiako eta Irango gerrek, Txinako lehiakideek eta Ameriketako Estatu Batuetako muga zergek bultzatu diotela neurria hartzera. ELAk itaundu du Irango akordioaren eragin positiboei buruz, baina ez du erantzun argirik jaso.
LABen salaketa
Bere aldetik, LABek exijitu dio enpresari Aldi Baterako Enplegu Erregulazioko Espedientea bertan behera uzteko. Sindikatuaren aburuz, zaila da ulertzea 1.200 milioi eurotik gorako eskari-zorroa duen eta hurrengo hilabeteetarako aurreikuspen positiboez hitz egiten jarraitzen duen enpresa batek ABEEE bat planteatzea.
Gainera, LABek gogoratu du konpainiak berak berriki adierazi duela eskari-zorro sendoa duela eta negozio-aukeren bolumen handia duela hurrengo hiruhilekoetarako.
Horrez gain, langile erakundeak azpimarratu du 2025ean 25 milioi euro inguru banatu zituztela dibidenduetan eta maiatzean beste 6,3 milioi euro banatu zituztela akziodunen artean. Gauzak horrela, sindikatuaren ustez, erakunde publikoek baimenduko diote enpresari etekin marjina hobetzea gizarte segurantzaren eta langileen langabeziaren kontura: "Baliabide publikoak kudeatzen dituztenek bermatu behar dute ABEEEk benetako beharrei erantzungo dietela eta gizarte osoaren diruarekin egoera koiunturalak finantzatzeko mekanismo bihurtuko ez direla, are gutxiago dibidenduak banatzen eta akziodunentzat mesedegarriak diren ordainsari-politikak mantentzen diren bitartean. Administrazioek ezin dute prestazioen ordaintzaile gisa bakarrik jardun".