Eva Lopez de Arroyabe EH Bilduko Arabako Batzar Nagusietako bozeramaileak prentsaurrekoa eskaini du gaur Kasinoan Laudioko, Aiarako eta Artzinieako alkateekin eta Amurrio eta Urduñako zinegotziekin ere.
Arabako Foru Aldundiak bultzatutako Aiaraldeko Garapen Industrialerako Mahaia baloratu du Lopez de Arroyabek. Lehenik eta behin, azpimarratu du eskualdeko Bizkaiko herriak ez dituztela gonbidatu eta horrek koordinazio arazoak sortu dituela: "Gabezia hori hilabete hauetan jorratutako gai askotan ikusi dugu. Hor dago Aiaraldeko Ikus-entzunezko HUBaren adibidea. Ez du inolako logikarik Araba eta Bizkaia eremu horretan 8 kilometrotan bi proiektu lehiatzen aritzeak. Nahiko sentsazio zabaldua dago elkarrekin lan egiteko eta eskualdeko udalerrien artean lehiatzeari uzteko beharraz".
Kritika hori plazaratzeaz gain, Arabako batzarkideak azaldu du EH Bilduk 80 proposamen egin dituela eta horietako batzuk estrategikoak direla. Adibidez, lurzoru industriala bultzatzeko premiak aipatu ditu: "Udalaz gaindiko industrialde bat sortzea, erakunde publiko batek kudeatuta; garapen-agentzien koordinazioa hobetzea, eskualdeko agentzia bihurtuz; edo ikerketarako eta garapenerako aholkularitza-sistema bat sortzea, enpresa txiki eta ertainei zerbitzua emango diena".
Energia trantsizioa ere izan du hizpide Lopez de Arroyabek. Bere ustez, energia berriztagarria sortu behar da non kontsumituko den kontuan izanda. Horregatik, defendatu du ezinbestekoa dela udalerri bakoitzaren behar energetikoak eta bitarteko berriztagarriarekin asetzeko duten gaitasuna ezagutzea, "Aiarak eta Artziniegak edo Laudiok Eguzki Mapa egiten hasi diren bezala".
Eragile guztiak
Aiaraldea Komunikabideak galdetu dio Eva Lopez de Arroyaberi azken astean Ahaldun Nagusiak eskualdeari buruz egin dituen adierazpenei buruz, zeinean oso kritiko izan den sindikatuekin. Ordezkari politikoa erantzun du Aiaraldeko Garapen Industrialerako Mahaian batzutan ez direla baldintzak eman eragile guztiek parte hartzeko eta kasu batzuetan EH Bilduk ere uko egin diola aritzeari.
Edonola ere, azpimarratu du ezinbestekoa dela guztien ekarpena eskualde erakargarria osatzeko.
Horrez gain, EH Bilduko bozeramaileak adierazi du erakundeak oso motel ari direla erantzuten Aiaraldeak bizi duen krisialdiari: "2018an Eusko Legebiltzarrean bultzatu nuen Aiaraldea agenda politikoan sartzea eta eztabaida horren ondorioz sortu ziren planak ez dira gauzatu, bereziki, industriaren esparruan".