Jarraipen nabarmena izan du EAEko elikagai merkataritzako sektorean deitutako grebak Aiaraldean, bi supermerkatu katetan batez ere. Dia eta BMren Laudio eta Amurrioko establezimenduek pertsiana jaitsi dute, jarraipena ia erabatekoa izan baita saltoki horietan.
ELA eta LABek deitu dute lanuztea, sektore horretako lan hitzarmenen estatalizazioaren aurka. Bi sindikatuek azaldu dutenez, Hego Euskal Herriko elikadura merkataritzako langileek euren lan baldintzak hobetzea lortu dute "borroka kolektiboari eta hitzarmen probintzialen negoziazioari esker". Baina langile erakundeek salatu dute ASEDAS patronalak negoziazio mahaia bultzatu duela "baldintza horiek estatuko enpresa-hitzarmenen bidez arautu daitezen". Ohartarazi dutenez, hitzarmen probintzial eta autonomikoak "edukiz hustea" ekarri dezake horrek, eta lan eta soldata baldintzak homogeinizatzea, "beherantz".
Horregatik erabaki dute gaurko greba deitzea: "Gaur gure hitzarmenak edukiz husten uzten baditugu, bihar askoz zailagoa izango da galdutakoa berreskuratzea".
