Gaur hasiko da Emakumeen Aiarako Biraren III. edizioa Orozkon. 17:00etan izango da udaletxe aurrean eta 2,2 kilometroko erlojupeko etapa egin beharko dute parte hartuko duten 180 txirrindulari inguruk.
Izan ere, atzo aurkeztu zuten proba Orozkon bertan antolatzaile eta politika zein kirol arloetako ordezkari ugarirekin.
Bihar izango da bigarren etapa, 17:00etan Laudion. Horrek 57 kilometro izango ditu eta Arespalditzaraino luzatuko da, gero Laudiora itzultzeko.
Igandean lehiatuko da 53 kilometroko azken lasterketa. 10:30ean abiatuko dute Amurrion eta inguruak zeharkatuko dituzte (Larrinbe eta Saratxo, adibidez) udalerrian amaitzeko.
18 talde
Euskal eta Arabar Txirrindularitza Federazioek, Laudioar Txirrindulari Elkarteak, Aiala Txirrindulari Elkarteak eta Amurrio Txirrindulari Elkarteak antolatutako hitzordua kadete eta junior kirolarientzat prestatzen dute eta guztira 18 taldek erantzun diote deialdiari.
Asko Euskal Herrikoak dira, baina badaude ere Kanariar Uhartekoak, Asturiasekoak, Extremadurakoak edota Valentziakoak. Guztira, 180 txirrindulari elkartuko dira irteeran.
Aurtengo edizioak erakutsi du Emakumeen Aiarako Bira egonkortu egin dela egutegian jadanik eta interesdunek, gainera, zuzenean jarraitu ahal izango dute proba osoa streaming bidez hemen, nahiz eta gomendagarriena errepideetan bertan ikustea den, jakina.