Preso eta iheslaririk gabeko Euskal Herri berria du ortzimugan Sare Herritarrak. Euskal presoen eskubideen aldeko eragileak Helmuga izena jarrio dio Euskal Herrian eragin nahi duen ziklo historikoaren aldaketari, eta bide horretan mobilizazio olatua abiatu du, gaur egungo egoerak "inoizko herri aktibazio handiena eskatzen duela" ulertuta.
Mobilizazioak Aiaraldean
Urtero bezala, eskualdeko jaiak baliatuko dituzte euskal preso eta iheslarien eskubideak defendatu eta hauen etxeratzea aldarrikatzeko. Datorren urtean gisa honetako mobilizaziorik ez egiteko asmoz ekingo diote aurtengo jaietan kaleak hartzeari. "Datorren urteko eskualdeko jaietan horrelako mobilizaziorik egin behar ez izatea nahi dugu. Horrek esan nahiko lukeelako dagoeneko gehiegi luzatu den auzi bati konponbide bat eman zaiola", azpimarratu zuten atzo Laudioko Herriko Plazan egindako agerraldian.
Amurrion, Laudion eta Orozkon egingo dituzte mobilizazioak. Abuztuaren 15ean jarri dute lehenengo hitzordua. Laudioko Jaietako txupinazoa probestuz elkarretaratzea egingo dute Herriko Plazan, eta egun berdinean manifestazioa egingo dute Amurrion, 20:30ean.
Abuztuaren 29an, Laudioko Odoloste Egunarekin bat eginez, gauerdian kalejira egingo dute tren geltokitik abiatuta. Azkenik, irailaren 2an, Orozkoko jaietan, elkarretaratzea egingo dute 20:00etan eta elkartasun afaria 21:00etan.
"Konponbidearen, bakearen eta elkarbizitzaren alde indarrak batu" eta mobilizazioetara batzeko deia luzatu diete Aiaraldeko bizilagun guztiei: "Hau, aldarrikapen uholde handi bat izatea nahi dugu. Bai, aurten ahalegin kolektibo handiena egin behar da euskal gizartearen gehiengoak aurrera egin nahi duela adierazteko. Horregatik, gaur, Laudio, Amurrio, Orozko, Areta, Arakaldo, Luiaondo, Okondo, Urduña, Aiara eta Artziniegako herritar guztiei dei egin nahi diegu Aiaraldean zehar antolatu ditugun aldarrikapen eta elkartasun ekimen hauetan parte hartzera eta urtarrilaren 9an konponbidearen alde kaleak hartzera".