Abuztuak emaitza positiboak eman dizkie eskualdeko txirrindulariei eta errepidean erakutsi dute lehiatzeko prest daudela jende gehiena oporretan badago ere. Hain zuzen, Ekhi Uriarte Leintz Bailarako itzuliaren 87. edizioan gailendu zen, Aretxabaletan. Abuztuaren 16an izan zen proba Lehendakari Txapelketaren barruan eta amurrioarra bakarrik sartu zen helmugan.
Zehazki, Gatzagako mendatearen bigarren igoeran lau txirrindulariko tropel txikia osatu zen ihesean, baina Uriartek burua hartu zuen jaitsieran eta atzean utzi zituen gainerako kirolariak.
BBK-Euskadi taldeko gazteak zortzi segundoko abantaila eskuratu zuen bere atzetik helmuga zeharkatu zutenei.
Jon Egia Aranda de Dueron
Jon Egia laudioarra, bere aldetik, Aranda de Dueron nagusitu zen ostiralean lasterketa oso azkarrean; 46 kilometro orduko batazbestea ezarri baitzuten.
Vuelta Ribera de Duero juniorraren bigarren etapan Egia adi egon zen ihesaldi erabakigarrian sartzeko eta azken kilometroan bere indarra baliatu zuen azken aldapetan buruan jartzeko eta garaipena eskuratzeko.
Laudion bisitariak irabazle
Larunbatean Lehendakari Txapelketak hitzordua izan zuen Laudion eta irabazleak kanpoko kirolariak izan ziren. Lehen postua Sergio Gamezentzat izan zen, bigarrena Unax Otegirentzat eta hirugarrena Alejandro Abril izan zen.