ELA sindikatuak oharra zabaldu du jakinarazteko Arabako kirol jarduerak eskaintzen dituzten enpresen langileak deituta daudela bost lanuzte egitera urrian; 7an, 13an, 15ean, 19an eta 23an, 8:30etik 10:30era eta 17:30etik 19:30era.
Mobilizazioen arrazoia da sektoreko VI. Lan Hitzarmenaren negoziazioak ez duela aurrera egiten. Dirudienez, enpresen ordezkariek irailaren 2an bukatutzat eman zituzten elkarrizketak eta langile erakundeek ez dute uste hitzarmen berria sinatzeko baldintzak ematen direnik.
ELAk onartu du aurrerapenak egon direla negoziazioan, lanaldiaren parekatzean, igande eta jaiegunetako plusetan eta APetan. Hala ere, desadostasuna nagusi da oraindik ITaren baldintzetan, antzinatasuneko hirurtekoetan, baimenetan eta “ordu hilak” deiturikoetan.
Gauzak horrela, sindikatuak uste du akordioa lortzea posible dela, baina bitartean, ez diote uko egingo mobilizazioak egiteari.