Temps enpresa jende bila dago Urduñan, ETAk bahitu eta hil zuen Miguel Angel Blancoren inguruko Blanco filmean parte hartzeko
Azaroan hasiko dira errodatzen Felix Viscarret zuzendariak gidatutako filma, eta egun zehatzetan egingo dira grabaketak, oraindik zehaztu gabe daudenak. Produkzioak jende asko behar du, eta, beraz, parte hartzeko interesa duten 18 eta 70 urte bitarteko herritar guztiei luzatu diete aurkezteko deia. Hemen eman daiteke izena.
Filmak Miguel Angel Blancoren azken orduak irudikatzea du helburu, bere bahiketaren eta hilketaren aurreko egunetako gertakariak pantailara eramanez. Besteak beste, garai hartako giroa eta herritarren mobilizazioa irudikatzeko eszenak osatuko dira, 1997ko testuingurua ahalik eta modu errealistenean islatzea izango baita produkzioaren helburuetako bat.
Produkzioak jende asko behar du, eta, beraz, parte hartzeko interesa duten 18 eta 70 urte bitarteko herritar guztiei luzatu diete aurkezteko deia.
Mikel Bustamante amurrioarra izango da Blancoren papera egingo duena. Aktoreak ibilbide oparoa egin du zineman eta telebistan, eta besteak beste, Maixabel, La casa de papel, Nasdrovia eta Cinco lobitos lanetan parte hartu du. Azken filma horretan egindako lanagatik, gainera, Goya sarietarako izendatu zuten Gizonezko errebelazio aktore onenaren kategorian. Oraingoan, pertsonaia historiko baten azalean jarriko da, Miguel Angel Blancoren azken orduak pantailara eramateko.
Beste aktore ezagun batzuek ere parte hartuko dute proiektuan, Eneko Sagardoy, Jon Ander Urresti, Natalia Huarte, Carlos Scholz, Lander Otaola, Susana Abaitua, Urko Olazabal, Amaia Aberasturi, Israel Elejalde eta Ramon Barea, besteak beste.
Estreinaldia uztailean
Filma 2027ko uztailean estreinatzea aurreikusi dute, Miguel Angel Blancoren heriotzaren 30. urteurrenarekin bat eginez. Proiektuak Miguel Angel Blanco Fundazioaren eta Blanco Garrido familiaren babesa ere badu.