Kalean da honezkero Aiaraldea Hemen hamaboskariaren zenbaki berria, 238. zenbakia alegia. Erreportaje eta elkarrizketa interesgarri ugarirekin osatu ditugu agerkariko 32 orriak.
Valentin Campo Aiara Txirrindulari Elkarteko zuzendaria ekarri dugu azalera. Campok 35 urteko ibilbidea egin du klubaren gidaritzan, eta ezbairik gabe erreferente bilakatu da kadete mailako txirrindularitzan. Orain ardura guztiak utzi eta albo batera egitea erabaki du. Aukera baliatu dugu Camporen ibilbide oparoa errepasatzeko.
Laudioko memoria gordeari ere egin diogu lekua Aiaraldea Hemen hamaboskarian. Maiatzean aurkeztu zuten herriko zazpi emakumerekin elkarlanean Ainhoa Resano artista bisualak garatutako ELLAS proiektua. Guk zazpi emakume horien testigantzak bildu ditugu, emakume anonimoen memoria berreskuratu asmoz.
Hauek eta beste hainbeste gai interesgarri aurkituko ditu irakurleak Aiaraldea Hemen hamaboskariko orrietan. Datozen egunetan banatuko da argitalpena eskualdeko saltoki, taberna, ikastetxe, kulturgune, liburutegi eta kaleetan, doan.