Ez Dok Bape taldeak izen bereko diskoa autoekoiztu du eta emaitzak entzun daitezke jadanik bandcamp plataformaren bitartez. Musikariek eurek azaldu dute punk eta reggae soinuak gailentzen direla rock oinarriaren gainean.
Hain zuzen, diskoaren A aldean punka da protagonista. Zati horretan diskoa zabaltzen du single moduan aurreratu zuten abestiak: Red Warriors, izen bereko Parisko talde antifaxistak gogoan. Horren ostean, Maskara erantzita eta Dena ilun datoz.
B aldean, aldiz, reggaea da nagusi. Amets hautsiak abestian, Europara bidean bizitza galdu duten migratzaileak ekartzen dituzte hizpidera. Diskoa ixten du Paradisurik ez kantak. "XXI. mendearen lotsaizun handienaz hitz egiten du: Israelgo estatua Gazan burutzen ari den genozidioa", argitu dute.
Beñat Ramosek grabatu ditu abestiak Ihesean estudioan eta Iñigo Escauriazak masterizatu El Submarino Recordsen.
Taldea Aiaraldeko bi lagunek osatzen dute eta beste biak ere Nerbioigoienakoak dira. Josu Garaita abeslariak Danban militatu zuen aurretik eta Gorka Chamorro hainbat proiektutan aritu da. Irkus Badillok eta Goio Ramosek borobiltzen dute laukotea.
Taldeak berak garrantzi handia ematen die letrei eta sozialak izan arren, abiapuntu pertsonala dutela nabarmendu dute.
Josu Garaita elkarrizketatu genuen duela bi urte, taldearen ibilbidearen hastapenetan: