Arabako Foru Aldundiak jakinarazi du 50.000 euro bideratuko dituela nahi gabeko bakardadearen kontrako proiektuetara. Guztira zortzi udalerrietako bederatzi ekimen hautatu dituzte dirulaguntza horien banaketarako eta eskualdeko bi egitasmo babestuko dituzte horien artean.
Alde batetik, Artziniega konektatzen: Komunitatea eta Zaintza ekimena laguntzea erabaki du Aldundiak, komunitate sareak eta belaunaldien arteko jarduerak sortzeko.
Bestetik, Amurriok bultzatutako proiektu pilotuak ere foru erakundearen babesa jasoko du, topaketarako eta bizikidetzarako landa espazioak sortzea aztertzeko.
Gizarte Ongizaterako Foru Erakundeak egindako deialdia Kuadrillei eta udalei bideratuta egon da eta pertsonen arteko harremanak erraztea, bakartze egoerak prebenitzea eta komunitate kohesioa indartzea du helburu.
Zehazki, honako egitasmo mota hauek izan dira onuradunak: laguntza komunitarioko programak, belaunaldien arteko jarduerak, memoria kolektiboa berreskuratzea, boluntariotza sareak, nahi ez den bakardade egoerak hautemateko prestakuntza eta adinekoentzako zein zaurgarritasun egoeran dauden beste kolektibo batzuentzako topaguneak.