75 mm-ko Gerra Zibileko obus bat zartatu zuen atzo goizean Ertzaintzak Inoson. Zehazki, ziza eta onddoen bila joan ziren Laudioko bi lagunek topatu zuten asteazken goizean. Herritarrek poliziari deitzea erabaki zuten.
Behin aurkikuntzaren berri eman eta gero, Ertzaintza eurekin jarri zen harremanetan eta laguntza eskatu zien lehergailua topatzeko. Asteazkenean operazioa abiatu zutenean gaua zenez jadanik, ostegunera atzeratu zuten esku-hartzea.
Gauzak horrela, ostegunean obusa topatu zuen laudioar batek bi ertzain eraman zituen tokiraino. Agenteek ziurtatu zuten arriskutsua zela egoera eta Ertzaintzaren desaktibazio unitatea bertaratu zen.
Laudioko herritarrak Aiaraldea Komunikabideari azaldu dionez, bi karga erabili behar izan zituzten ertzainek, lehenengoarekin ez baitzen zartatu. "Sekulako burrunba sortu zuen eztandak Inosoko haranean", aipatu du aiaraldearrak.