Gaur greba eguna ez bada ere, hankaz gora dago Renferen C-3 linea. Hainbat zerbitzu ez ditu eman enpresa publikoak eta 14:00etan Abandotik atera behar dena eta 15:22ean Laudiotik abiatzen dena ere ez dituzte eskainiko.
Arazoak 10:30ak aldera hasi dira Urduñan, tren batek matxura teknikoa izan duelako. Horrek ordutegiak moldatzera behartu du konpainia, eta atzerapen luzeak gertatzeaz gain, zenbait zerbitzu kendu dituzte.
Edonola ere, egoerak okerrera egin du eguerdian. Abando eta Ollargan arteko trafikoa bertan behera utzi dute, azpiegituran izandako beste matxuraren ondorioz. Ondorioz, ez da normaltasuna itzuli garraio publikora.
Erabiltzaileek eurek azaldu diote Aiaraldea Komunikabideari itxaronaldi luzeak egiten ari direla.