Gaur (azaroak 28) jarri dute martxan “Puntu berdea” egitasmoa Amurrioko Udalak eta Amurrion Bidean elkarte publikoak, arriskutsuak ez diren hondakinak kudeatzeko helburuarekin. Modu horretan jarraipena eman nahi izan diote Amurrio EKOiztu proiektuari.
Aldaiturriaga eta Maskuribaiko industrialdeetako enpresekin elkarlanean aritu dira horretarako. Bi gune horietako lantegiak bisitatu dituzte lehendabizi, zer motatako hondakinak eta zein kopurutan sortzen dituzten ikusteko. Bildutako datuak aztertu ondoren aurkeztu dute “puntu berdearen” egitasmoa. “Egitasmo honen xedea da enpresek sortzen dituzten hondakinak ahalik eta ondoen bereiztea lortzea, hondakinen birziklagarritasuna areagotzeko eta ahal den neurrian zabortegietara ez botatzeko, bertan amaitzen baita hondakinaren bizi-zikloa”, adierazi dute.
Aldaiturriagako kamioien aparkalekuan jarri da puntua, eta enpresek sortutako ondorengo hondakinak bilduko dira bertan: film edo plastikozkoak, zurezkoak eta paper edo kartoizkoak.
Lau asteko iraupena
Egitasmoak lau aste iraungo du eta astelehen, asteazken eta ostiraletan egongo da irekita, ordutegi honetan: 9:00etatik 11:00etara, 13:00etatik 15:00etara eta 17:00etatik 19:00etara. “Proiektuak arrakasta badu, udalerriko gainontzeko industrialdeetara zabaldu daitekeen aztertuko da”, jakinarazi dute egitasmoaren sortzaileek.