25,8 milioi euro galdu ditu Tubos Reunidosek urteko lehen bederatzi hilabeteetan. Hala adierazi du enpresak bere egoera ekonomikoa aztertzeko eginiko txostenean.
Galerak hirukoiztu egin zaizkio Tubos Reunidosi, iaz 8,5 milioi eurokoak izan baitziren epe berean. Hala ere, 161,1 milioi eurotan baloratutako salmentak egin ditu denbora tarte horretan, eta inbertsio ugari ere gauzatu ditu, kalitate altuko hodiak ekoizteari begira.
Hortaz gain, enpresak adierazi du pedido garrantzitsu bat lortu duela Egiptoko petrolio enpresa baten eskutik gainbalio handiko hodiak ekoizteko (10.000 tona metriko lehor guztira).
Houstoneko enpresa bat erosi du, 19,6 milioi euroren truke
Tubos Reunidosek aurten egin duen inbertsio esanguratsuena Estatu Batuetako Houston hirian kokatutako Rotary Drilling Tools (RDT) enpresa erostea izan da. Hemendik aurrera bertara bidaliko ditu enpresak Amurrion ekoitzitako hodiak, azken ukituak emateko. Orain arte beste enpresa batzuen zerbitzuak kontratatu behar izan ditu horretarako.
Aseguruak ordaindu ditu suteen kalteak
Eginiko informean enpresak adierazi du hainbat kostu sortu dituztela 2016ko lehen hiruhilekoan Amurrioko lantegian egondako suteek, baina gaineratu du koste horiek aseguruak ordaindu dituela.
Bestetik, enpresak nabarmendu mesedegarria egingo zaiola Europar Batasunak hodi txinatarren auziaren harira eginiko ebazpenak. “Merkatu europarra hobeto defendatzeko aukera emango digu horrek”, adierazi du Tubos Reunidosek txostenean, “orain arte gure prezioak asko sufritu baitute Txinaren lehia desleiala dela eta”.