Frontoi kaleko obrak esleitu berri ditu Amurrioko Udalak. Asfaltados y Construcciones Morga S.L. enpresa arduratuko da obra egiteaz, 847.977,92 euroko aurrekontuarekin. Hilaren amaieran hasiko dira lanean, eta 12 hilabeteko epean amaitu beharko dute proiektua.
Udaletik adierazi dute kalea “oso-osorik eraberritzea” dela asmoa, “zirkulazioa berrantolatuaz, oinezkoentzako gune berriak sortuaz eta instalazioak berrituaz”. Kalearen diseinua ere egokituko dela adierazi dute udaletik, “mugikortasun-planaren irizpideekin bat etor dadin eta Juan Urrutia plazarekin dauden arazoak konpon daitezen”.
Hortaz gain, obrak baliatuko dira “hiriko zerbitzu eta instalazio guztiak” (ura, saneamendua, telekomunikazioak, argiteria, elektrizitatea eta abar) berritu eta aireko instalazioak lurperatzeko.
Modu horretan herriko irisgarritasuna “erabat hobetzea” espero dutela adierazi du Josune Irabien alkateak.
Aparkatzeko tokia
Toki bat antondu du udalak, obrak gauzatu bitartean auzokideek aparkaleku gisa erabili ahal izango dutena. Lucas Rey eta José Madinabeitia kaleen arteko elkargunean dago 1.168 metro karratuko espazio hori. Irabienek azaldu du udalaren asmoa dela “kaleko obrak bukatutakoan ere aparkaleku publiko bat egotea hirigunetik gertu, dauden premiei erantzuteko”.
Partaidetza-prozesua
Udaletik jakinarazi dute kontuan izan dituztela 2015eko urriaren eta aurtengo martxoaren artean eginiko partaidetza prozesuan parte hartu zuten herritar eta merkatarien iritziak obraren nondik norakoak zehazterako orduan.