Azaroaren 1ean Legazpin izandako proban eliteko feminen bigarren postua eskuratu zuen Luisa Ibarrola saratxoarrak, Olatz Odriozolaren atzetik. Alabaina, junior kategorian garaile izan zen.
Europan hogeitabigarren
Emaitzei erreparatuz gero, denboraldi izugarria egiten ari da aiaraldearra. Duela gutxi, esaterako, Europako Ziklokross proban lehiatu zen, 22. sailkatuz. Txirrindulari gaztea izaki, oso emaitza ona da: "Espero bezalako karrera izan da. Banekien ez nintzela ondo posizionatuta aterako, beraz, lasaitasuna mantendu beharra nuen lehenengo bihurguneetan erorketak saihesteko. Lehen bi itzulietan lasterketa apurtzea zaila zen, denak taldean ibiltzekoa zen".
Prentsa oharrean azaldu duenez, pixkanaka aurrera egitea lortu zuen, eta lasterketaren erdian Alicia Gonzálezekin, Nadja Heigl austriarrarekin eta Évita Muzic frantziarrarekin osatu zuen taldea. "Oso pozik nago egindako karrerakin, lehen hamarren artean sailkatzeko maila duten txirrindulariak dira horiek. Baina une berean jakitun nintzen azken itzulietan egindako esfortsua ordaindu beharko nuelaz".
Izan ere, Junior kategorian lehiatu berri da Ibarrola, eta kategoria aldaketak ahalegin erantsi bat suposatuko diola dio. "Denboraldi hasiera honetan oraindik luze egiten ari zaizkit lasterketak. Nekatuta bukatu dut, baina esperientziarekin oso aseta".