Gaur eguerdian sinatu dute Amurrioko Bañueta kiroldegiko langileek lan baldintzak hobetzeko akordioa Kirolzer enpresarekin.
Akordio horren bidez hemendik aurrera lan-hitzarmen propio bat izango dute langileek, ELA sindikatutik azaldu dutenez. Honako puntu hauek jasoko ditu hitzarmen horrek: 3 urteko iraunaldia, bizitza-mailaren (IPC) araberako soldata igoera eta lanaldia 30 ordura murriztea. 2010tik izoztua zegoen antzinatasun kontzeptuaren berreskurapena ere barnebiltzen du hitzarmen berriak. Hiru plus ere aurreikusten dira: ekintzagatikoa, garraioarekikoa eta deiekikoa. “Anti-erreforma” eta subrogazio klausulak ere ditu akordioak, besteak beste.
Amurrioko Udalaren jarrera ere aipatu du ELAk, komunikabideei helarazitako oharrean. ”Akordioa lortzeko Amurrioko udalak gatazkan bitartekari lana egitea ezinbestekoa zen”, adierazi dute sindikaturik, eta gaineratu dute “ udalak hori lehenago egin behar zuela” pentsatzen dutela, “greba alferrik ez luzatzeko, kiroldegiko erabiltzaileei eragozpenak sortzen”.
“Borrokak merezi du”
Langileek eskerrak eman nahi izan dituzte Amurrioko herritarrengatik jasotako babes eta elkartasun keinuengatik. ELAk adierazi du langileak pozik daudela lortutako akordioarekin. “Beste behin adierazi dezakegu borrokatu izanak merezi izan duela”.