Amurrioko Udalak adostasun osoa lortu du alderdien artean abiatzeko parte hartzerako prozesua. Horren bitartez herritarrek erabakiko dute 400.000 euroren erabilera inbertsiotan.
Diru kopurua bi ekitalditan banatuko da: 2106. eta 2017. urteetan, alegia.
Baldintzak
Prozesuak 4 fase izango ditu. Horietan parte hartzeko derrigorrezkoa izango da 16 urte edo gehiago izatea eta Amurrion erroldatuta egotea. Elkarteen kasuan, kide batek, gutxienez, bete beharko ditu baldintzak.
Proposamenak
Lehenengo fasean proposamenak jasoko dituzte. Aintzat hartu behar dira bi kontu; alde batetik batzar administratiboak kanpoan geratuko dira, eskumenik ez baitauka udalak bertan. Bestetik, inbertsioak besterik ezin dira iradoki.
Horretarako postontziak jarriko dituzte, web-gunea plazaratuko dute (www.amurriokoekin.eus), eta posta elektronikoa ere egongo da (partehartzea@amurrio.eus). Gainera, saio irekiak egingo dira, auzoetan, adibidez.
Balorazio teknikoa
Bigarren urratsa udalak emango du, proiektuen bideragarritasun teknikoa eta ekonomikoa bermatu beharko baititu eta balorazioa egingo du. Horrez gain, ziurtatuko du gutxieneko balio etikoak beteko dituztela.
Lehentasunak
Proiektu guztiak batu ostean, lehentasunak finkatuko dituzte herritarrek. Heltzen diren proiektu guztien artean 20 hautatuko dituzte eta horretarako talde motorrak irizpideak finkatuko ditu.
Talde horretan udal teknikariak, elkarte eta auzoko ordezkariak eta norbanakoak egongo dira.
Deialdi irekietan herritarrek ezarriko dituzte lehentasunak aurrez zehaztutako irizpide horiek erabilita.
Herri bozketa
Maiatza edo ekainean herri bozketa antolatuko dute amurrioarrek hautatu ditzaten egikarituko diren proiektuak; 400.000 euroko diru-saila bukatu arte. Ondorioz, proiektu bakarra edo gehiago izango dira, herritarren nahien arabera.
Bozketan 16 urte gorako eta Amurrion erroldatutako lagunek parte hartuko dute.
Lehenengo deialdia
Prozesuaren azalpen guztiak emango dituzte azaroan 9an Katekesi Aretoan 19:30ean.