Informazio kanpaina bat prestatu du Orain Amurriok. Kanpaina horren helburua izango da udal zerbitzuen ber-publifikazioa aldarrikatzea. “Orain Amurrioren hauteskunde programaren ardatzetako bat enpresa pribatuen esku dauden udal zerbitzu pribatizatuak ber-publifikatzea eta zuzenean kudeatzea zen”, adierazi dute udal talde politikoko kideek prentsa ohar baten bidez. Egoera horretan dauden hainbat zerbitzu aipatu dituzte: “Kiroldegia, kale garbiketa, udal eraikinen, eskolen eta kirol instalazioen garbiketa, lorezaintza, eta abar”.
Kudeaketa pribatuen aurrean, “zerbitzuak ber-publifikatzea eta zuzenean kudeatzea” da aukerarik onena, Orain Amurrioko kideen ustetan. “Hala dirua aurrezteko nola zerbitzu hobea eta eraginkorra emateko, eta enpleguaren prekarietatea eta soldata baxuak ekiditeko”.
Hitzaldia bihar
Kanpaina hainbat ekimenez osatua egongo da. Alde batetik, triptiko bat banatuko dute herriko postontzietatik. Bestetik, biharko (urriak 21) antolatu duten hitzaldia dago. Javier Gimenok eskainiko du. Gizarte Zerbitzuetako eta Langilego arloko arduraduna da bera, Zaragozako Udalean. Udal horretan aurrera eramaten ari diren ber-publifikazio esperientziak azalduko ditu. Hitzaldiaren ostean eztabaida bat bideratuko da bertaratutako guztien artean.