Bi enplegu plan jarriko ditu martxan Amurrioko Udalak, Sartu Araba erakundearen bidez. Sei hilabeteko iraupena izango dute bi planek. Udalaren asmoa da modu horretan bederatzi pertsona kontratatzea. Programetako bat “hiri-ingurunea berreskuratzea” izango du helburu eta lau peoi eta langileburu bat kontratatuko dituzte horretarako. Beste programan hiru peoi eta langileburu bat kontratatuko dituzte, “landa-ingurunea berreskuratzea” xede hartuta.
Izena emateko baldintzak
Programa horien bidez kontratatuak izango diren pertsonak Lanbide-Euskal Enplegu Zerbitzuan egon beharko dira erregistratuak. Hortaz gain, honako kolektibo hauetakoren bateko kideak izan beharko dute: diru-sarrerak bermatzeko errenta (DSBE) jasotzen dutenak, 35 urtetik beherakoak, 6 hilabetez edo gehiagoz lan-bilatzaile gisa erregistratuta egon diren 45 urtetik gorakoak, iraupen luzeko langabeak (eskaintza hau argitaratu aurreko 18 hilabeteetan gutxienez 12 hilabetez Lanbiden erregistratuta egon direnak), 55 urtetik gorako pertsonak, gizartetik at gelditzeko arriskuan daudenak, baliaezintasunen bat dutenak, familia-erantzukizunak dituzten emakumeak (ezkontidea, 26 urtetik beherako seme-alabak edo 26 urtetik gorako seme-alaba ezinduak beren mende dituztenak edo harreran hartutako adingabeak dituztenak) eta genero-indarkeriaren biktima diren emakumeak.
Urriaren 26a azken eguna
Baldintza horiek betetzen dituzten herritar interesdunek Amurrioko Lanbideren bulegoan eman beharko dute izena. Urriaren 26a izango da horretarako azken eguna.