Bost urteko etenaldiaren ondoren, Amurriok irailaren 28an ekingo dio Begibistan film laburren jaialdiari. Hiru egunetan eskualdeko zein Euskal Herri mailako 31 obra proiektatuko dira Amurrio Antzokian. Aurten, zinemastearen VI. edizioan, Leyre Berrocal aktore amurriarrak jasoko du Ohorezko Txapela.
Asteazkenean, hilak 28an, aukezpena egingo dute 20:00etan eta, ondoren, Nerbioibistan ataleko film laburrak proiektutatuko dituzte (55min). Ostegunean Ofibistan atal ofizialeko bi proiekzio egongo dira, bata 19:00etan eta bestea 21:00etan, biak 90 minutukoak. Ostiralean, 19:00etan eskainiko dituzte atal ofizialeko azken filmak eta 21:00etatik aurrera sari banaketa burutuko dute, Ohorezko Txapelaren omenaldia egiteaz gain.
Jaialdiaren zuzendaria den Kepa Sojo laudioarrak Berrocalen ibilbidea nabarmendu du, "Gurea jaialdi gaztea da, baina Leyre bezala, denbora gutxian erreferentzia bilakatu da. Omenaldiak ez dira soilik nagusiei egin behar, gazteen lana ere saritu behar da". Antzezle amurriarrak zinemagintzan, telebistan zein antzerkian egindako lana saritu nahi dute omenaldi horrekin. Iñigo Salinero 'Txaflas' eta Susana Soleto antzezle ezagunek aurkeztuko dute itxiera gala.
211 obra
Jaialdiaren aurkezpenean Kepa Sojok azpimarratu nahi izan du jasotako lanen "kalitate eta kantitatea", izan ere, aurten 211 lan jaso dituzte. "150 inguru jasotzea espero genuen, baina azkenean benetako astakeria bat izan da" Sojoren esanetan, "argi dago, beraz, euskal zinemagintza sasoi onean dagoela". Horietatik 31 hautatu dituzte, 6 euskaraz.
Kultur arloko ordezkariak epaile
Guztira 3.200 euro banatuko dira saritan: 2.200 euro Amurriko Udalak emango ditu eta Arabako Foru Aldundiak 1.000 euro emango dizkio euskaraz egindako film labur onenari. Lehiaketaren sarien zerrenda, epaimahaikideen iritziz onena den filmari emango zaion sariarekin (1.200 euro) eta Ofibistan nahiz Nerbioibistan sailetan ikusleek emango duten sariekin (500 euro, sail bakoitzeko) biribilduko da. Jaialdiko epaimahaikideak aurten Amurrio zein eskualdeko kultur arloko ordezkariak izango dira, EHUko irakasle amurriara den Andere Larrinaga, Inma Roiz Okondoko idazlea eta José Kruz Gurrutxaga antzezle gipuzkoarra hain zuzen.
Aiaraldeko sortzaileei deia
Oso pozik agertu dira aurkezpenean Josune Irabien Amurrioko alkatea, Kepa Sojo zuzendaria eta Igone Martinez de Luna, Kultura, Kirola eta Euskara foru diputatua. "Gure asmoa da zinemastea aukera eta plataforma izan dadila amurriorentzat, talentua sustatu eta haintzat hartzeko" alkateak adierazi duenez. Martínez de Lunak nabarmendu duenez, "Araban ezinema ekoizpen nabarmena dugu eta sortzaile horientzat lehiaketa gehiago antolatu behar dira, egindako lana ikusarazteko".
Sojok Aiaraldeko sortzaileei gonbita ere luzatu die: "Gaur egun zinemagintza demokratizatu da. Mugikorrekin edo kamara sinple batekin ere film laburrak egin daitezke. Aiaraldeko jendeari sortzeko deia egin nahiko nieke hurrengo urteetarako. Familian eta lagunekin gozatzeko eguna izan beharko luke proiekzio eguna. Jai on bat egin behar dugu".
Sarrera eta gonbidapenak
Proiekzioetara joateko 2 euroko sarrera ordaindu beharko da. Itxiera galarako sarrera doan izango da, baina gonbidapena beharrezkoa izango da.