Pasa den ostiralean, Eli Pinedo amurrioarrak bere erretiroaren arrazoien berri eman zuen Espainiako Olinpiar batzordearen egoitzan egindako prentsaurrekoan. Bertan entrenatzaile, jokalari eta lagun ugariren babesa izan zuen eta Espainiako olinpiar batzordeak eta Espainiako eskubaloi federazioak oroigarri ezberdinak eman zizkioten jokalari amurrioarrari.
Rioko olinpiar jokoetatik itzultzean eman zuen Elik bere erretiroaren berri, olinpiar jokoak behar bezala prestatu ahal izateko. Final-laurdenetan Frantziako selekzioaren aurka galdu ostean, Espainiako selekzioa kanporatua izan zen eta ondo pentsatu ostean, erretiroa hartzeko erabakia hartu zuela azaldu zuen amurrioarrak.
Gorputzaldi ona zuela azaldu zuen eskubaloi jokalariak, ziur aski entrenatzen eta jokatzen jarraitzeko arazorik ez zuela izango baina bere buruak ezetz esan zion eta bere ibilbidearen puntu goren batean erretiratzeko hautua egin duela argitu zuen.
Ondoren eskerrak eman zizkien bere alboan izan diren lagun, jokalari eta entrenatzailei. Familiako kideei ere hitz ederrak eskaini zizkien eta bere ibilbideko taldeei eskerrak eman ostean, berak sortutako arropa ekologikoko proiektuan murgilduta jarraituko zuela azaldu zuen (‘London sieteunosiete’ izenekoa).
Ibilbide oparoa
Eskubaloi profesionalean 17 denboraldi bete ditu Eli Pinedok. Urte horietan Europako Txapelketa eta brontze olinpikoa irabazi ditu espaniar selekzioarekin. Izan ere, 201 partida jokatu ditu talde horrekin eta 438 gol sartu. Lorpen horrek oso ospe handia eman dio.
Horrez gain, Itxako eta Bera Bera euskal taldeetan lehiatu da eta hainbat txapelketetan izan da garaile; 6 liga eta 4 kopa irabazi ditu, besteak beste. Danimarkan ere aritu zen jokatzen.