Josune Irabien alkateak eta Nuria Lopez eta Estibaliz Sasiain zinegotziek prentsaurrekoa eskaini dute gaur herriko jaien balorazio positiboa egiteko.
Udal ordezkariek azaldu dute eguraldiak lagunduta partaidetza handia egon dela Amurrioko ospakizunetan. Horretarako, ostalarien iritzia jaso dute, lan asko izan baitzuten txupinazoan eta Kalakan zein Kiko Venenoren kontzertuetan.
Datuei dagokionez, 2.000 odoloste errazio zerbitzatu zituzten eta San Roken 850 bazkari baino gehiago. Izan ere, harakinek 3 egunetan bukatu zituzten 6 eguneko haragia.
Alkateak aipatu du tabernetan eta txosnetan jende ugari elkartu dela gaueko 01:00ak arte.
Kirolean 180 txirrindularik parte hartu zuten lasterketan larunbatean, nahiz eta bero handia egin.
Pregoilaria
Alkateak nabarmendu du Manuel Plaza pregoilariaren inplikazio jaietan. Berez, hainbat ekintzatan parte hartu du eta, bereziki, aipatu du oso modu atseginean aritu zela Atzoko Gazteen Egunean nagusien egoitzan.
Gertakaririk ez
Udalak hiru kanpaina egin ditu; euskararen erabilera sustatzeko, alkoholaren kontsumo arduratsua bultzatzeko eta eraso sexistak ekiditeko.
Azken horretarako Beldur Barik erakusmahaiak jarri zituzten eta 500 txapa eta hainbat edalontzi banatu “Ez da ez” leloarekin.
Horrez gain, protokoloa adostu zuten erasoak salatzeko, baina, zorionez, ez dute erabiltzeko beharrik izan.
Koadrilen lana
Udal ordezkariek azpimarratu dute koadrilen lana, kaleak animatu baitituzte. Gainera, oso positibotzat jo dute aurten karrozen desfilea puntual hasi dela.
Zaldi ikuskizuna
Aurten zekorketa bertan utzi dute eta horren ordez zaldi-ikuskizuna antolatu dute. Alkatearen ustez, publiko gehiago lortzeko parada zegoen. Josune Irabienen ustetan, baliteke horren aurkako kanpaina egon izan, baina emaitza interesgarria dela azaldu du.
Berez, eztabaida irekitzeko balioko duela iritzi du alkateak.