Herriko jaiei begira, Amurrioko Udalak protokolo berezia abiatu du kaleak garbi mantentze aldera. Gaurtik eta abuztuaren 17ra bitartean, hamabi bat langile arduratuko dira egunero kaleak garbitu eta bildutako zaborra jasotzeaz. Lan horiek egiteko, kamioi baldeatzailea, kalea garbitzeko kamioia eta presio handiko tutuak erabiliko dira, desinfektatzaile eta usain txarra kentzeko produktuekin batera.
Kale-garbigailu horrentzat jaiegun bakoitzean garbiketarako lehentasunak ezarri dira, aurreko egunean jende gehien biltzen dituzten azken ekintzen eremuen arabera eta egunaren lehenengo ekintzen arabera. Gune horiek garbitu ostean, udalerriaren ohiko garbiketa egingo da.
Hainbat ekintzek garbiketa-ahalegin berezia eskatuko dute, besteak beste, txupinazoak. Kasu horretan, ekintza amaitu eta Juan Urrutia plaza hutsik geratzen denean, lantaldeak eremua saneatu eta sortutako hondakin guztiak bilduko ditu.
Txosnaguneari dagokionez, txosna bakoitza arduratuko da eremu bakoitza higiene-baldintza egokian mantentzeaz, eta, bestetik, enpresako langileek eremuaren barrualdea eta gune publikoak garbituko dituzte. “Jaiak amaitutakoan, jai-eremua zehatz-mehatz garbituko da, eremu horren egoera egokia bermatzeko” azaldu du Josune Irabien Amurrioko alkateak.