Amurrioko Udalak sentsibilizazio- eta kontzientziazio-programa bat diseinatu du jaietako alkohol kontsumoaren harira. Egitasmoak hainbat proposamen ditu, eta helburua pedagogikoa da nagusiki: “Alkohola behar bezala erabiltzea; hau da, arazorik ekartzen ez duen kontsumo bat izatea”, azaldu dute GAPPA gizarte eta hezkuntza arloko udal-zerbitzuako arduradunek.
Kanpaina hau ikusgarri egiteko, prebentzio-zerbitzuak hainbat ekintza egingo ditu. Alde batetik, jai egitaraua jasotzen duen aldizkarian informazio orri bat gehitu dute alkohol-arazoak murrizteko hainbat aholku eta ideiarekin. Besteak beste, bertan jasotzen da jan ondoren edateko aholkua eta astiro egitekoa. Horrez gain, abuztuaren 13an, larunbatean, aurreko urteetan bezala, aditu talde batek alkohol-tasaren neurketak egingo ditu, eta banan-banan jakinaraziko du emaitza, baita gidatzean izan ditzakeen eraginak ere.
Saltzearen debekua
Programa osatzeko, bereziki adingabeei eta nagusiki nerabeei zuzendutako kanpaina bat egingo da, kolektibo horri alkohola saltzea debekatuta dagoela gogorarazteko. Horretarako, Udalak informazio-kartelak egingo ditu “Ekintza honek bi helburu ditu; batetik, nerabeek alkohola ez kontsumitzeko autokontrol-jarraibideak sustatzea eta, bestetik, ostalaritza- lokalak eta txosnak adingabeen alkohol-arazoak prebenitzeko inplikatzea”, azaldu du Amurrioko alkate Josune Irabienek.