Amurrioko Udalak jakinarazi du sei izango direla abuztuaren 12an hasiko diren jaiek iraun bitartean txosna jarri ahal izango duten elkarteak. "Txosnen Batzordeak, Korroskada Txosna Elkarteak eta Otsemeak-ek egin dute txosna jartzeko eskaera", azaldu dute udaletik, eta gaineratu dute horiez gain beste talde hauek ere jarriko dutela barra: Herriarenak Koadrilak, Agaoiakukutz eta Mendiko Lagunak. "Halaber, Amurrio Aisia Eskaut Taldea aisialdi taldeak ere izango du txosna bat, José Madinabeitia kalean egongo dena".
Irekitzeko eta ixteko ordutegiak
Udalak azaldu du txosnek "ireki eta ixteko ordutegi zehatza" izango dutela: "Hilaren 12an, 13an eta 15ean, 19:00etatik 05:00etara izango da ordutegia; soinua jaitsi egingo da goizeko hiruretan, eta itzali egingo da txosna ixtean. Hilaren 14an, ordutegia 12:00etatik 16:00etara eta 19:00etatik 05:00etara izango da, eta musikaren bolumenari dagokionez, aurreko egunetako arau berdinak egongo dira. Abuztuaren 16an ordubete lehenago itxiko dira txosnak, goizeko lauretan, eta musika hirurak baino lehen kenduko da. Azken egunean, abuztuaren 17an, ordutegia 19:00etatik 01:00etara izango da, eta soinua 01:00ak baino lehen itzaliko da".
Baldintza gehiago
Ordutegiaz gain, beste baldintza batzuk ere bete beharko dituzte txosna jartzen duten taldeek, udalak jakinarazi duenez. Txosnetako kideek Elikagaiak Manipulatzeko Txartela beharko dute izan, baldin eta bokatak edo bestelako elikagaiak zerbitzatzen badituzte. Txosna bakoitzaren arduradunak, bere aldetik, bermatu egin beharko du Alkohola eta Tabakoaren Sustapena, Publizitatea, Salmenta eta Kontsumoa Kontrolatzeko Neurriak Arautzen dituen Udal Ordenantza (2003-04- 15) betetzen dela.
Bukatzeko, udalak eszenatokia jarriko du txosnen alboan, kontzertuetarako. Eszenatokiaren alboan lau komun eramangarri jarriko dituzte.