Nerbioiko Parke Linealaren Amurrioko zatia luzatzeko lizitazioa onartu zuen atzo Arabako Foru Aldundiak. Bidea 1,7 kilometro luzatzea da asmoa. Laudio eta Amurrio lotzen dituen bide hori 8,8 kilometro izatetik 10,5eko luzera izatera pasako da horrela.
Luzatze lanak aurten hastea da Aldundiaren asmoa, eta datorren urteko udaberrirako amaituak egongo direla aurreikusi du Josean Galera Ingurumen eta Hirigintza Saileko foru diputatuak. 469.889 euroko aurrekontua baliatuko da obrak egiteko. Aurrekontu horren erdia EGEFF Eskualde Garapenerako Europar Funtsaren bidez finantzatuko da. Obra horien bidez pasabide berri bat eraikiko da Nerbioi ibaiaren ibilgua saihesteko, oinezkoentzako, txirrindularientzako zein gurpildun aulkian doazen pertsonentzako balioko duena.
169.000 erabiltzaile urtero
Foru Aldunditik nabarmendu dute Nerboiko Parke Lineala dela Araban gehien erabiltzen den oinezko eta txirrindularientzako ibilbidea, Vasco-Navarro Trenbide Zaharrarekin batera. 169.000 pertsonek erabiltzen dute urtero.
Ikusi hemen ibilbide zati berriari buruzko informazio gehiago.
Ikusi hemen Nerboiko Parke Linealaren inguruan 2014an eginiko erreportajea.