Abuztuaren 12tik 17ra, 70 kultur jarduera baino gehiagok beteko dituzte Amurrioko kaleak. Aurtengo jaietako kontzertu handia Kiko Veneno izango da. Udalak 167.953 euro inbertitu ditu egitarauan.
Ohiko jarduerez gain, urte honetarako diseinatu duten programak hainbat nobedade izango ditu. Musikaren alorrean abuztuaren 13an, gaueko 24:00etatik aurrera, Kiko Veneno flamenko eta rock musikari ezagunak Juan Urrutia plaza hartuko du. Gwa Ya Reggae Band aiaraldearrak hartuko du kontzertu handi horren lekukoa 2:00etatik aurrera. Kuadrillen egunean, abuztuaren 14an, Los Otros bertsioen taldeak bi emanaldi eskainiko ditu. 21:00etatik aurrera Joaquín Sabinaren bertsioen kontzertua eta ondoren, 23:00etatik aurrera, 60, 70 eta 80ko hamarkadetako musika saioa.
Antzerkia
Kale antzerki emanaldi ugari egongo dira jaietako egunetan. Besteak beste, abuztuaren 14an “Jekyll on ice” egongo da ikusgai Asparreneko umore antzerkiaren XXII. jaialdiari esker. Bestetik, Trapuzaharra konpainiak “Ongi etorri Findemundo” obra taularatuko du San Roke egunean. Egun horretan ere “Pomper” emanaldi berezia egongo da ikusgai Larrinagako oinezkoen esparruan, izan ere, xaboi-burbuila erraldoietan oinarritzen den gau ikuskizuna da.
Haurrentzako ekintzak
Abuztuaren 13an, ohi bezala, umeak izango dira jaietako protagonista, izan ere, goizez zein arratsaldez jolas parkea izango dute, besteak beste. Berrikuntza moduan, aurten ere “Itsasoko jolasak” deituriko haurrentzako jolas gunea egongo da hilak 15ean eguerditik aurrera.
Kirola
Ohiko txapelketaz gain, udal frontoiak txupinazo egunean eskupilota partidu handi bi hartuko ditu. Batetik, Dorronsoro eta Legarretak Iriarte eta Arregiren kontra arituko dira. Eta bestetik, kirol horren munduko mitak: Titín III eta amurrioko Murga, herrikoa den Guerrero eta Beginoren aurka.
Zezenketak
Amurrioko zezen plazak hiru zenzenketa ikuskizun hartuko ditu aurtengo jaietan. Abuztuaren 13an haurrentzako animalien erakustaldi bat egingo dute. Sarrerak 3 euroren truke salduko dira. Hilak 15ean, berriz, ohiko errekortadore emanaldia egongo da. Prezioa 15 eurokoa izango da eta haurrentzat (4-12 urte) 10 eurokoa. Abuztuaren 16an, San Roke egunean, “El Duende Ecuestre” heziera ikuskizuna eskainiko dute.