Amurriok onartu berri du Nerbioiko Parke linealaren tarte berriaren proiektua, Sagrada Familia ikastetxea zenaren eta Olako auzoaren arteko zatia, hain zuzen. Arabako Foru Aldundiak gauzatuko du proiektua, baina udalak egin beharko ditu desjabetzeak obrekin hasi aurretik.
Josune Irabien Amurrioko alkateak azaldu duenez, 1,7 kilometroko luzera duen tartea atontzeko, bide publikoak erabiliko dituzte batez ere, baina desjabetze batzuk egin beharko dituzte aurretik.
Horretarako 48.000 euro inbertituko dituzte. Lanak urte amaieran hasi eta hurrengo urtean amaitzea aurreikusita dago eta Arabako Foru Aldundiak 469.000 euro bideratuko ditu Nerbioiko Parke linealarekin jarraitzeko.
Olakon bukatuko da momentuz ibilbidea
Bidea Olakon amaituko da, Iparralde tren geltokitik 300 metrora. Irabienek azpimarratu duenez, obra berriak, gainera, ahalbidetuko du San Roke inguruko auzokideek trenbide zerbitzua gertuago izatea.
Erabiltzaile ugari
Aisialdirako proposamena eskaintzeaz gain, proiektu horrek Nerbioi ibaiaren aniztasun naturala berreskuratzeko helburua du.
Araban momentu honetan dauden bide berdeen artean Laudio, Luiaondo eta Amurrio lotzen duenak erabiltzaile kopuru altuena du. Hori neurtzeko Gardean eta Amurrio kontagailuak instalatuta daude.