Amurrioko Udalak osasun zentro berria eraikitzeko obra-baimena eman berri dio Osakidetzari. Gauzak horrela, makinak “aste gutxi barru” sartuko direla adierazi du Josune Irabien alkateak.
Mendiko kaleko 3. zenbakian kokatuko den anbulatorio berriak solairu bakarra izango du, mantenua garestituko luketen eskailera edo igogailurik gabe.
Fatxadak aluminio eta beiraz eraikiko dira. Anbulantzia eta zamalanetara bideratutako aparkalekuaz gain erabiltzaileei zuzendutako parkinga ere atonduko dute.
2,7 milioi euro eta 10 hilabete
Anbulatorioa Eraikuntza Birgaikuntza Artapena eta Eldu enpresek sortu duten Aldi Baterako Enpresa Elkarteak eraikiko du, hori izan baita Osakidetzak jaso dituen 24 eskaintzetatik puntuazio altuena jaso duena.
2,7 milioi euroren truke, osasun zerbitzu berria 10 hilabetetan prest egon beharko da kontratuan adierazitakoaren arabera.
Pediatria zerbitzu indartua
Profesionalen zein erabiltzaileen erosotasuna helburu, kontsulten kopurua handituko dute eta espazio zabalagoak diseinatu dituzte.
Besteak beste, zentro horretan osasun zerbitzu orokorrak eskainiko dituzte, etxean zein anbulatorioan bertan, diagnostikoak eta terapiak egiteko prozedurak, atentzio aringarriak eta kirurgia txikia.
Egindako planak pediatra bat gehiago aurreikusi badu ere, ez du ginekologia eta traumatologia zerbitzua barne hartzen.