Inauxako langileak egoera korapilatsuan daude orain. Tubos Reunidos taldeak saldu berri dio enpresa Mubea korporazio alemaniarrari, eta hori guztia gertatu da hitzarmen kolektibo berria negoziatzen ari ziren unean gertatu da.
Momentuz, langile batzordeak ez du harremanik izan Mubeako ordezkariekin eta, ondorioz, Tubos Reunidosek hautatutako zuzendaritzarekin mintzatzen ari dira.
Mubeak etekinak handitu nahi ditu, antza
Oraindik indarrean dagoen zuzendaritzak azaldu die langileei Mubearen asmoa dela etekinak handitzea, eta, horretarako, zenbait gastu murriztu nahi dituela; langile kontratatuetan, besteak beste.
Adierazpenak ezinegona sortu du beharginen artean, harreman zuzenik ez baitute enpresa alemaniarrarekin. Hala ere, argi daukate euren lehentasuna dela etorkizuneko konpromisoa lortzea.
Oraingo zuzendaritzak jarraitu nahi du
Tubos Reunidosek enpresa saldu arren, egungo zuzendaritzak jarraitu nahi du. Horretarako, Mubeari proposatu diote ekoizpen unitatea sortzea Inauxa, Inaumex eta Inautec lantegiekin (Txekiako faktoria batekin eta Zornotzako ingeniaritza batekin). Modu horretan, egungo zuzendariek oraindik kudeatuko lukete ekoizpen unitatea.
Horrela izango balitz, Inauxara bideratuko lituzkete produktu berrien ekoizpena eta zaharrak Txekiara bideratuko lituzkete.
Zuhurtasuna langile batzordean
Dena den, langileen ordezkariek uste dute zuhurtziaz jokatu behar dutela Mubeako arduradun batekin hitz egin arte eta informazioa zuzena eskuratu arte. Izan ere, orain arte izandako informazioa zuzendaritzak eman die.