Amurrioko Udalak 2016-2019 Irisgarritasun Plana onartu berri du. Horren bitartez herriko eremu publikoetan, eraikinetan, garraiobideetan zein komunikazio-sistemetan irisgarritasuna bermatu nahi dute.
Hurrengo urteeetarako bide-orria izango den horretan gaur egungo egoera aztertu eta egin beharreko hainbat lan jaso dituzte. Hirigintzari dagokionez, aurten Maskuribai kaleko espaloia urbanizatuko dute, Mendiko kalean oinezkoentzako pasabide berria jarriko dute, Frontoi kaleko lanak egingo dituzte eta kale horretatik Juan Urrutia plazara sartzeko bide berria jarriko dute, besteak beste. Etorkizunera begira beste lan batzuk aurreikusten du planak: oinezkoentzako pasabideak egokitzea eta obrak egitea Jose Pikatza kalearen inguruan, Lexarraga plazan eta Boriñaur kalean.
Garraio eta komunikazioan
Gainera, irisgarritasuna hobetuko dute Lucas Rey haur-eskolan, San Mames Etxean, Udaltzaingoaren eraikinean, Zabaleko Herri Eskolan eta udal-frontoian, besteak beste. Garraioari dagokionez, autobus geltokiak eta plaza erreserbatuak egokitzeko asmoa dago. Komunikazio arloan keinu-hizkuntzako interprete bat izateko aukera aztertuko dute.
Plan honek 2001ekoa ordezkatzen du. Eusko Jaurlaritzaren Etxebizitza Sailak diruz lagundu du eta Ikersare Análisis Sociológicos enpresak burutu du.