Luisa Ibarrola saratxoarra Suitzan izandako nazioarteko gazeentzako ziklokros kontzentrazioan egon zen ekainaren 14tik 19ra. UCIk, nazioarteko txirrindulari batasunak, antolatutako kontzentrazioan munduko ziklokroslari ezberdinak izan ziren irakasle, tartean Sven Nys belgikarra, 13 aldiz ziklokroseko Superprestige txapelketaren irabazlea.
Aigleko herriko Munduko Txirrindularitza zentroan ziklokrosa ikasi eta gozatzeko aukera
Luisak hamahiru herrialde ezberdinetatik joandako txirrindulari ezberdinekin egoteko aukera izan du eta bertan ikasitakoarekin, neguan jokatzen den kirol mota honen inguruko heziketa jaso eta sakontzeko aukera izan du.
Irakasleen artean, nazioartean ezagunak diren ziklokroslariak izan ditu, Sven Vanthourenhout eta Geoff Proctor tartean baina irakasle ospetsuena historian zikokrosean garaipen gehien dituen Sven Nys kirolaria izan da, guztira 13 Superprestige txapelketa eta munduko bi txapelketa dituenak.
Ernesto Garciaren esanetan, elkarretaratze honek ziklokrosaren inguruko interesa sustatzeko balio izan du. Herrialde ezberdinetatik etorritako kirolarien arteko kulturaren elkartrukatzea bizipen aberasgarria da txirrindularientzat eta Sven Nys bezalako irakasleak izatea, inoiz izango ez duten aukera bat da.
Instruktore ezberdinek erakutsitako alde taktiko eta teknikoak oso baliagarriak izango dira, etorkizunera begira, aurrerapausoak errazago eman ditzaten. Horrela aurreko herrialdeko txirrindulariek irekitako bidea jarraitu ahalko dute, bertako ziklokros maila handituz.