Amurriok Begibistan VI. Zinema astea antolatuko du irailaren 28tik 30era. Hala, lau urteko etenaldiaren ondoren, Antzokiko eskaintzak jaialdia berreskuratuko du aurten, euskal zuzendari eta ekoizleentzako “erreferentziazko ekitaldi eta topalekua” izateko asmoz. Kepa Sojo zinema-zuzendari arabarra izango da ekimen horren gidaria.
Jaialdiaren edizio honek bi sail ofizial izango ditu: Ofibistan delakoa, Hautaketa Batzordearen iritziz onenak diren 2015 eta 2016 urteetan ekoitzitako euskal film laburrak eskainiko dituena eta, bestetik, Nerbioibistan sail berria, Aiara inguruko eta Nerbioi Garaiko film laburrak sustatzea helburu duena. Horrez gain, euskaraz eginiko ekoizpenak ere izango du txokoa jaialdiko sarituen zerrendan.
Sariak eta omenaldiak
Lehiaketaren barruan 3.200€ sarituko dira. Horrez gain, 1.200€ emango zaizkio epaimahaiaren iritziz film labur onena denari, eta 500€ Ofibistan eta Nerbioibistan sail bakoitzean publikoak puntu gehien ematen dionari.
Halaber, oraingoan ere omenaldia egingo zaio euskal zinemagintzako munduari ekarpen bereziren bat egin dion pertsona bati. Aurreko ekizioetan Txema Blascok (2009), Ramón Bareak (2010) eta Itziar Lazkanok (2011) jaso dute Ohorezko Txapela saria.