Amurrioko Udalbatzak onartu du, talde guztien adostasunarekin, Villa Fe etxea Aiarako Kuadrilari eskaintzea, erakundeak bere egoitza ofiziala bertan ezarri dezan. Hala ebatzi zuten maiatzeko osoko bilkuran, eskualdeko erakundeak herriei proposamenak egiteko eskatu ondoren.
Aiarako Kuadrila da egoitza propioa ez duen bakarra Araban. 2010eko abuztuko udalbatzan onartu zen lehenengoz eraikin hori erakundeari eskaintzea. Eraikina atontzeko diru-kopurua prest bazegoen ere, lekualdaketa ez zen gauzatu. Gaur egun nagusien Eguneko Zentroa eta Erretiratuen Etxea kokatzen dira eraikin horretan, Intxaurdio kaleko 1. zenbakian. Aiarako Kuadrilak proposamena onartzen badu, jarduera horiek garatzeko beste kokapen bat bilatu beharko lukete.
Jasangarritasunaren alde
Bestetik, aho batez berretsi zuten taldeek Udalsarea 21en jasangarritasunaren aldeko udalerrien konpomisoa eta bat egin zuten, guztien aldeko botoekin ere, Euskal Adierazpenarekin, hiri eta herri jasagarrien Europako 8. konferentzian adostutako hitzarmena, hirien jasangarritasunari bidea emateko asmoz.
Partehartzea
Josune Irabienek, Amurrioko alkateak azaldu zuen moduan, ekainean ekingo diete osasun zentro berria eraikitzeari. Horren aurrean eta gaur egun anbulategia hartzen duen eraikinarekin zer egiteko erabakitzeko, prozesu partehartzailea hasteko asmoa adierazi zuen.