Vicente Contreras Usateguik egindako bilduma irabazi du 'Amurrioko hiribildua' XXXVII. argazki lehiaketa. "Amurrio" izeneko bildumako argazkietan zuribeltzean irudikatu ditu herriko une desberdinak. 800€ eta garaikurra jasoko du ekainaren 3an izango den sari banaketan. Egun horretatik hilak 27ra arte zabalik egongo da aurkeztutako obren erakusketa La Casonan.
Bigarren postua “Ladrillo y cielo” Manu Barreiro Rodríguezen obrak lortu du. Gai libreko kategorian, berriz, Diego Piedra Benzalen “Consecuencias” lana saritu du epaimahaiak. Bigarren sariaren irabazlea José María Rubio Calonge da, “Extrarradios” lanaren egilea. Edizio honetan 79 bilduma aurkeztu dira lehiaketara. Horietatik 61 gai librean lehiatu dira eta beste 18 udalerriari buruzkoak izan dira.
Aurten herritarren sari berezia ere esleituko dute. La Casonako erakusketan bildumak bozkatzeko aukera egongo da, aurrez aurre zein telematikoki Udalaren webgunearen bitartez, ekainaren 3tik 20ra bitartean. Herritarren Sari Berezia 200 eurokoa izango da, eta ekainaren 24an banatuko da. Botoa eman duten herritar guztien artean irabazle izan den bildumaren formatu txikiko hiru kopia zozkatuko dira.