Lana sustatzeko Amurrion burutu diren programetan epe luzeko hamar langabe aritu dira trebakuntza jasotzen eta lanean. Bukatu berri diren ekimen horiek 2015eko azaroan jarri zituzten martxan.
Sartu Alava irabazi-asmorik gabeko eta gizarteratzerako erakundearekin batera gauzatu dituzte.
Proiektuen bitartez, besteak beste, lorezaintza, igeltserotza, margolaritza eta basoetako zein hiri-altzarietako mantenu-lanak egin dituzte herriko zein Administrazio Batzarretako hainbat eremutan.
Parte hartzaileek eskarmentua eta gaitasun profesionala lortu dute, gerora lan-merkatu sartzeko erraztasuna izan dezaten. Izan ere, ekimenak trebakuntza prozesu teorikoa eta praktikoa izan du.
25.000 euro gehiago 2016an
Lanbideren, Eusko Jaurlaritzaren Lanbide Zerbitzuaren, eta Amurrioko Udalaren artean finantzatu dute ekimena.
Langabezian dauden pertsonentzako horrelako programak egiten jarraitzeko asmoa adierazi du Udalak. Aurten 194.000 euro gorde ditu Amurriok lana sustatzeko ekintza hauetarako, hortaz, aurten 25.000 euro gehiago daude aurreko urtearekin alderatuta.