Laugarren urtez, Amurriok trukerako merkatua egingo du maiatzaren 27an, ostiralean. Egun horretan arratsaldeko 17:00etan ekingo diote ekimenari. CDak, liburuak eta jostailuak trukatzeko aukera egongo da, herritar guztiei zabalik. Gainera, jolasak eta bidezko merkataritzako txokolate-jana egingo dute. Ekintza guztiak Juan Urrutia plazan gauzatuko dira. Merkatu horren bitartez kontsumo arduratsua sustatu nahi du Udalak. Halaber, Bigarren eskuko objektuen trukea duin bihurtzea du xede.
Trukerako baldintzak
Elkartrukean parte hartzeko, maiatzaren 23tik 26ra bitartean Amurrioko udaletxera, udal liburutegira edota ikastetxera eraman beharko dira objektuak, identifikazio-zenbakia jarri eta erregistroan sartzeko.
Udaletik azpimarratu dute CDak, liburuak eta jostailuak direla trukatu ahal izango diren objektu bakarrak eta “garbi eta egoera bikainean” egon behar dutela. Pertsona bakoitzak gehienez hiru gauza aurkeztu ahal izango ditu merkatuan. Objektu bakoitzeko truke-txartel bat jasoko du eta txartel hori azokan interesatzen zaion beste gauza bat eskuratzeko erabili ahal izango du.