Aurtengo Txakolin Eguna maiatzaren 22an ospatuko dute Amurrion. Herriko kaleak, Juan Urrutia plaza erdigune, ardo berezi horren kolore, usain eta zaporez beteko dira prestatu duten egitarau zabalari esker.
Jaia 11:30ean hasiko da ohorezko aurreskua eta 2015eko Arabako Txakolina saria banatu ostean. Salvador Velillak jasoko du aurten omenaldia.
Goizean artisau azoka egingo dute, produktuen erakusketa eta salmentarekin. Gainera, tokiko eta kalitate goreneko produktu ugari dastatzeko aukera egongo da. Besteak beste, basatxerri, Label kalitatezko Oilasko Lumagorria, Kantauriko antxoak, Label kalitatezko Euskal Hanburgesa, Albizabal piparrak eta Amurrioko harategietako produktuak, odolostea, txistorra, saltxitxa zuriak, kreole txorizoa egongo dira.
Horiek probatzeko tiketak erosi beharko dira. 12:00etatik aurrera, txakolinpintxoa egingo dute herriko hainbat tabernek. 2 euroren truke, pintxoa eta Arabako Txakolina Jatorrizko Izendapeneko ardoa eskainiko dute.
Garrafa lehiaketa
Egun horretan ere Arabako III. Garrafa lehiaketa egingo dute Arabako txakolina oinarri hartuta. Eguerdian hasiko da norgehiagoka eta 13:00etan ekingo dio epaimahaiak prestatutako edariak probatzeari. Sari banaketa 13:30ean izango da.
Egun horretan Gesaltzako Bandaren emanaldia egongo da eguerditik aurrera eta arratsaldean, 15:30etatik 17:30etara erromeria egingo dute.