Amurriok 'Euskaraz bizi nahi dut' jaia ospatuko du berriro, aurten hilak 21ean. Egitarau zabala prestatu dute herriko elkarteek udalarekin batera euskararen erabilera aldarrikatzeko. Hala, kirol zein kultur ekintza anitz egongo dira herrian zehar egun horretan, goizetik hasita.
Kirolarekin ekingo diote parte hartzaileek egunari. Goizeko 8:00etan Babio mendira irteera egiteko aukera egongo da Amurrio Trail Taldeari esker. 10:30ean, berriz, ordubeteko errugbi entrenamendua eskainiko dute parkean Nerbioi Rugby Taldeko kideek.
Gainera, zumba saioan aritzeko aukera ere egongo da 13:00etan herriko plazan.
Umeentzako eskaintza zabala
Amurrion ere haurrentzako ekintzak egongo dira egun horretan. Izan ere, 11:30etatik 14:30etara eta 16:30etatik 18:30etara jolasak, tailerrak eta gaztelu puzgarriak antolatuko dituzte plazan.
Gurasolagunak goiz horretan Luiaondora joango dira. Bizikletaz egingo dute erromesaldia eta bertan puzgarriek eta umeentzako jokoek ere itxarongo dituzte.
Kultur proposamenak egunean zehar luzatuko dira. Dantzaz gozatzeko, besteak beste, erakustaldia egongo da eguerdian parkean eta arratsaldez, Kukai Dantza taldeak 'Gela jauziak' ikuskizuna eskainiko du Larrinagako oinezkoen aldean.
Herri bazkaria eta bertso-afaria
Egun osoko egitarauari eusteko herri bazkaria egingo dute San Anton plazan. Paella, pastela eta kafea eskainiko dute 10 euroren truke.
Parte hartzeko tiketak AEK, Aiara Dantza Taldea edota Kultur Etxean eros daitezke. Horren ondoren mus txapelketa ere egingo dute euskaraz.
Gauean, ordea, bertsotan arituko dira Miren Amuriza eta Iñaki Viñaspre. Gazte Asanbladak antolatuta, Gaztetxean egingo dute afaria 7 euroren truke. Txartelak erosteko Txokogorri edota Albizabalera jo beharko da.