Amurrio Bidean eta APYMCA elkarteak merkataritza sustatzeko “Street Art Amurrion” ekimena aurkeztu dute. Horren bitartez udalerriko hainbat merkataritza-guneetan 3Dko irudien amarruak jarriko dira ikusgai espaloietan margotuta, herriko kaleak erakargarriagoak bihurtu eta tokiko kontsumoa sustatzeko helburuarekin.
Ekimen honen protagonistak izango diren artelanak hautatzeko lehiaketa planteatu dute. Hala, parte hartzaileek obren zirriborroak bidali beharko dituzte maiatzaren 20a baino lehen. Jasotako proposamen guztietatik bost hautatuko dituzte, kontuan hartuta diseinua, originaltasuna eta tokiko merkataritza sustatzen duten elementuak. Lehiaketaren oinarriak www.amurrio.org webgunean kontsultatu daitezke.
Artista irabazle bakoitzak 500 euro jasoko ditu sari moduan eta beste 300 euro materialak erosi eta lana gauzatzeko uztailaren 4 eta 5a bitartean. Obrak Frontoi kalean, Dionisio Aldama kaleko oinezkoen alderdian, Guk eskulturaren ondoan, Kultur Etxearen aurrean eta pasealekuan egongo dira.
Herritarren sari berezia
Artearen munduarekin zerikusia duten bi pertsonak eta tokiko merkataritzaren ordezkari batek osatuko duten epaimahaiaz gain, Amurrioko herritarrek aukera izango dute gogokoen duten diseinuaren alde bozkatzeko ekainaren 6tik 9ra bitartean. Aurrez aurre bozkatu ahalko da, Kultur Etxean, eta baita Apymcaren aplikazioa erabiliz ere. Herritarren Sari Berezia 300 eurokoa izango da. Gainera, fase honetan bozkatzen duten herritar guztien artean Apymcaren 50 euroko bi opari-txartel banatuko dira.