Atzo Amurrioko Udalak 2016 urteko aurrekontuak onartu zituen ezohiko osoko bilkuran. Herriak 12.608.991,09 euro izango ditu aurten, iaz baino 714.000 euro gutxiago. Aurrekontuen proiektuak EAJ eta PSE-EEren aldeko bozak jaso ditu, Guk Bai, PP eta EH Bilduren abstentzioak eta Orain Amurrio-Podemosen aurkako botoak.
Inbertsioak
Inbertsioei dagokionez, Amurriok guztira 1.399.840 euro erabiliko ditu aurten, iaz baino 168.433 euro gutxiago.
Horietatik proiekturik garrantzitsuena Frontoi kaleko urbanizazioa izango da, Obra eta Zerbitzuen Foru planaren laguntzaz ere finantzatuko dena. Besteak beste, saneamendu eta estolderia sistemak berritzeko 300.000 euro erabiltzea onartu dute eta jolas parkeetan 60.000 euro inbertituko dituzte, konponketa orokorrak egin eta horietako bat estaltzeko.
Gainera, Tokiko Enplegu Planak 25.000 euro gehiago jasoko ditu eta herriko pertsona nagusiek diru-sail propioa izango dute.
Bestalde, euskara ikasteko, Reforreko gimnasioa hobetzeko, bonotaxia ordaintzeko eta Administrazio Batzarrentzat diru gehiago egongo da. Horrez gain, Apymcak -herriko merkatarien eta ostalarien elkarteak- 6.000 euro gehiago jasoko ditu.
Onartutako txostenaren arabera, langileen gastuek 4.014.007 euro suposatuko dizkiote Amurrioko Udalari, iaz baino %1,3 gehiago.