Larunbat honetan izango da Amurrion Aiaraldean ospatzen den lehenengo ezkontza tematikoa. María Martínez eta Imanol Zabalak 'Grease' filmean oinarritu dira haien ospakizuna antolatzeko, “ohiz kanpoko zerbait egiteko” asmoarekin. Egun horretan gonbidatu guztiei John Travolta eta Olivia Newton-Johnen filman bezala janzteko eskatu diete, 50. hamarkadako koloretako gona eta larruzko jakekin. Josune Irabien Amurrioko Alkateak ezkonduko du bikotea baina Martínezek azaldu duenez, “momentuz ez dugu lortu bera ere mozorrotzea, saiatzen jarraitu beharko dugu”.
Lagun batzuen ezkontzan inspiratu ziren haien ekitaldia antolatzeko, “egun horretan Athletic Clubeko kamisetekin joan ginen guztiok” eta antzeko zerbait egitea bururatu zitzaiela dio María Martinezek, “Ni Argentinakoa naiz eta ez nuen nahi zuriz jantzita ezkontzea nire familiatik urrun egonda”. Argentinako selekzioaren eta Athletic Clubeko kamisetekin egitearen ideia baztertu ondoren, 'Shrek' filmean oinarrituta egitearen ideia bururatu zitzaien, “asko gustatzen zaigu filma” baina ideia baztertu zuten “gonbidatuentzat ez litzateke batere erosoa izango”.
Geroz eta ezkontza zibil gehiago
Ezkontza zibilen kopuruak gora egin du eskualdean. Amurrion, adibidez, 2010. urtean mota honetako 13 ekitaldi ospatu zituzten. Iaz, 2015ean, berriz, 20 ezkontza zibil egin zituzten hiribilduko udaletxean.