Mikel Landak, Sky taldeko txirrindulariak, irabazi du Garrastatxun amaitu den Euskal Herriko Itzuliaren 2. etapa. Bi kilometro falta zirenean Wilco Keldermanen (TLJ) erasoari erantzun eta helmugan segundo bateko tartea ateraz irabazi du Zuiako gazteak Aiaraldea zeharkatu duen etapa euritsua. Sailkapen nagusiaren lehen postua eskuratu du gainera.
Egungo ihesaldian 4 txirrindulari izan dira hasieratik eta Caja Rural talde nafarreko Angel Madrazo sartu da bertan. Etapa aurrera joan ahala, lasterketa burua txikitzen joan eta bi mutil bakarrik geratu dira buruan Madrazo bera eta Denifl. Nahiz eta 4 minutuko abantaila izan duten, 11 km. faltan harrapatu egin dituzte.
Eta orduan hasi dira komeriak tropeleko lehen postua nork lortuko Garrastatxurako igoeraren hasieran ondo kokatuta joan ahal izateko. Faborito guztiak aurrean sartu dira eta orduan iritsi dira lehen erasoak. Erasoen ondorioz bi txirrindulari aurreratu dira, Landa eta Kelderman, eta haien artean jokatu dute etaparen garaipena, Mikel Landa zuiarra gailenduz.
Harrigarria izan da arabarraren garaipena, oso gutxi lehiatu baitu aurten. Beste faboritoek lehiaketetan egun gehiago igaro dituzte eta beraz kontuan hartzeko txirrindularia izango da Euskal Herriko Itzuli honetan.
Azkenik, atzetik beste faboritoak banan-banan heldu dira euren artean segundo gutxi ateraz. Amaierako sailkapenerako jokoa oso irekia dago oraindik eta larunbatera arte borrokatu beharko dute Eibarreko podiuma zapaldu ahal izateko.
Arazoak Amurrion
Lasterketan arazoak izan dira, Amurrioko zatian, elizaren alboan dagoen errotondan olio putzu bat izan baita. Itzuliaren antolakuntzak Amurrioko kanpoaldetik pasatzeko hautua egin du, Amurrion kokatuta zeuden bitarteko helmugak kenduz.