“Ulermenerako ikaskuntza” eredua hasi dira aplikatzen Amurrioko Virgen Niña ikastetxeko klaseetan. Eskolatik adierazi dute datorren ikasturteari begira Lehen Hezkuntzako Giza eta Natur arloetako metodologia moldatzen ari direla, “ulermenerako ikaskuntza” ardatz nagusi moduan izanda. Irakasleak ere formazio saioak jasotzen ari dira, EmPeCemos plataforma baliatuta.
Iaz ekin zioten metodologia hori ikastetxean probatzeari. “Proiektu horretan formatzen ari ziren bi irakasle praktika bat egitera etorri zitzaizkigun”, azaldu dute zentroko arduradunek, “horrela marko pedagogiko bat sortu zen Bostoneko Harvard Unibertsitateko aditu talde batek zuzenduriko Project Zerok-tik”.
Lehen Hezkuntzako 5. mailako ikasleekin egin zuten lehen saiakera, Unibertsoari buruzko unitate didaktiko batekin. Esperientzia horren emaitzen aurkezpena egin zen gero, non eta Floridako Nazioarteko Unibertsitatean, pentsamenduari buruzko biltzar batean.
Orduan erabaki zuten ikastetxeko kideek metodologia horretan sakontzea, “behin emaitzak ikusita eta ikasleen balorazioa zein zen jakinda”.
Ikasleen aktibazioa
Metodologia berri horrek ahalbidetzen du ikasleak “hartzaile pasibo huts” izatetik “eragile aktibo” izatera igarotzea, ikastetxetik azaldu dutenez. Horretarako hainbat helburu finkatzen ditu metodologia horrek: “Ikaskuntza adierazgarria lortzea, pentsamendu sakonean oinarrituz berariazko ulermena erdiestea, eta ezaguerak nahiz pentsamenduak nork bere bizitzara eraman eta hartan aplikatzea”.
Baina proiektuak ez du “Ulermenerako ikaskuntza” deritzon metodologia soilik barnebiltzen, Visible thinking eta "adimen anitzeko teoriak" ere inplementatzen ditu.
Ikastetxeko Haur Hezkuntzako 4 urteko gelakoek metodologia horren gaineko ikerketa batean parte hartuko dute, estatuko eta beste herrialdeetako beste hainbat ikastetxeekin batera. Virgen Niñatik adierazi dute ikerketa horren emaitzak 2017. urtean Miamin egingo den ICOTen (International Conference On Thinking) aurkeztuko direla Angela Salmonen eskutik (Project Zeroko eta Harvardeko kidea).
Irakurri hemen proiektuaren sustatzaileetako bati eginiko elkarrizketa.