Katalunian abiatutako prozesu independentistari buruzko hitzaldia antolatu du Aiaraldeko Gure Esku Dago-k. Bihar izango da hitzordua, 19:00etan Amurrioko Katakesi Aretoan.
Lau izango dira bertan arituko diren hizlariak. Alde batetik, Liz Castro egongo da, Assemblea Nacional Catalanako (ANC) nazioarteko harremanen arduraduna. Kataluniako Asanblada Nazionala 2012an sortu zen, Herrialde Katalanen independentzia lortzeko asmoarekin. Helburu horri begira hainbat ekimen antolatu ditu talde horrek. Ikusgarriena 2013an antolatutako Via Catalana izan zen, herrialdea goitik behera zeharkatu zuen 400 kilometroko giza-katea.
Beste bi hizlari (Jose Maria Clavero eta Joan Sole) Súmatekoak izango dira. 2013an sortutako erakunde horrek boto independentista sustatzea du helburu, non eta gazteleraz mintzatzen den komunitatean.
Azken hizlaria Omnium Cultural entitatekoa izango da. 1961an sortu zen talde hori, hizkuntza katalana sustatzea xede harturik.