Miloi bat euroko galera izan zuen Tubos Reunidos enpresak ostegunean gertatutako istripuan soilik. Horri atzoko suteak eragindako kalteak gehitu beharko dizkio enpresak; pabiloi bat erre baitzen atzo.
Gaur suhiltzaileak, langile finkoak eta behin behineko beharginak aritu dira lantegian garbiketa egiten.
Iruñeara ekoizpen zati bat
Azpiegiturek izandako kalteak direla medio, ekoizpenaren zati bat Iruñeako Acecsa enpresara bideratuko dute, Tubos Reunidos taldekoa da lantegi hori ere.
Azido klorhidrikoa ibaian
Atzoko sutea piztu zen azido upelak dauden pabiloian, eta itzaltzeko suhiltzaileek ur ugari erabili zuten. Upelek zeukaten azido klorhidrikoak -zehaztu gabeko kopurua- ibaian bukatu du. Gaur bistakoa zen eragina.
Ingurumen Saileko eta Ura Agentziako teknikariak egon dira gaur egoera aztertzen.
Sare sozialetan askok zabaldu zuten atzo laino toxikoa sortu zela, baina Gentza Alamillo Aiarako alkateak kontrakoa adierazi zien herritarrei. Josune Irabien Amurrioko alkatea ere enpresara hurbildu zen.
[video:https://vimeo.com/153686336 width:600 height:350]
Istripua
Gertakaria 19:30ak aldera jazo zen, pabiloi batean sutea piztu eta gero. Aiara, Gasteiz eta Derioko suhiltzaileak ez ezik, Karrantza, Amurrio eta Alonsotegiko Babes Zibileko taldeak ere bertaratu ziren. Ez zen zauriturik egon.
Urtarrileko 3. istripua izan zen atzokoa.