Aurten ere ez dute hutsik egingo Bertsolaritza Txapelketa Nagusiko finalistek Amurrioko zitara. Zortziak arituko dira bertsotan datorren igandean (urtarrilak 10) Amurrioko Antzokian 20:00etan hasiko den “Bertso jaialdian”. Jaialdi horren hamaikagarren edizioa izango da aurtengoa.
Amets Arzallus, Aitor Mendiluze, Beñat Gaztelumendi, Maialen Lujanbio, Aitor Sarriegi, Igor Elortza, Sustrai Colina eta Unai Iturriaga jarriko dira mikrofonoaren aurrean. Gai-jartzailea Naroa Sasieta izango da.
2013an ospatu zen Bertsolaritza Txapelketa Nagusiaren azken edizioa. Arzallus izan zen garaile, eta bigarren postua lortu zuen Lujanbiok.
Sarrerak Kultura Etxean salgai
Sarrerak Amurrioko Kultura Etxean daude salgai, zortzi euroren truke. Amurrioko Antzokian ere egongo da tiketak eskuratzeko aukera egunean bertan, aurretik agortzen ez badira betiere.
BIDEOA: Iazko edizioan Unai Iturriaga eta Amets Arzallusen artean eginiko bertso-sorta.
[video:https://www.youtube.com/watch?v=HKcKgEiOsNM]
Aurreko edizioetako bideo gehiago daude ikusgai bertsoa.com web-gunean.